Бүлэг 17Ариун хүмүүсийн эцэс хүртэл тэсвэрлэх тухай

Бурхан Хайрт Нэгэний дотор хүлээн авч, Сүнсээрээ үр нөлөөтэй дуудан ариусгаж, Өөрийн сонгогдсон хүмүүсийн үнэт итгэлийг өгсөн хүмүүс нигүүлслийн байдлаас бүхэлдээ ч, эцэстээ ч унахгүй.^a Харин тэндээ эцэс хүртэл баттай тэсвэрлэж, мөнхөд аврагдана. Учир нь Бурханы бэлгүүд ба дуудлага буцалтгүй бөгөөд Тэр тэдний дотор итгэл, гэмшил, хайр, баяр хөөр, найдвар болон Сүнсний бүх нигүүлслийг үхэшгүй байдал хүртэл төрүүлж, тэтгэсээр байдаг. Олон шуурга, үер босож тэднийг цохивч, итгэлээр бэхлэгдсэн суурь ба хаднаас нь тэднийг авч хаяж чадахгүй. Итгэлгүй байдал ба Сатаны сорилтоор Бурханы гэрэл ба хайрын мэдрэгдэх үзэгдэл хэсэг хугацаанд^b үүлэрч, бүдгэрч болох боловч Тэр хэвээрээ^c байна. Тэд аврал хүртэл Бурханы хүчээр хадгалагдаж, худалдан авсан өвөө эдэлнэ. Учир нь тэд Түүний алган дээр сийлэгдсэн бөгөөд тэдний нэр амийн номд мөнхөөс бичигдсэн.

Ариун хүмүүсийн энэ тэсвэрлэх байдал нь тэдний чөлөөт хүсэлд бус, харин Эцэг Бурханы чөлөөт, өөрчлөгдөшгүй хайраас урсах^d сонголтын тогтоолын өөрчлөгдөшгүй байдалд; Есүс Христийн гавьяа ба зуучлалын^e үр нөлөө болон Түүнтэй нэгдэлд; Бурханы^f тангарагт; Түүний Сүнсний оршин байдал ба тэдний доторх Бурханы^g үрэнд; мөн^h нигүүлслийн гэрээний мөн чанарт тулгуурладаг. Эдгээр бүхнээс энэ тэсвэрлэх байдлын баттай ба алдаа мадаггүй чанар гардаг.

Тэд Сатан ба ертөнцийн сорилт, дотор нь үлдсэн завхралын давамгайлал, хадгалагдах арга хэрэгслүүдийг үл тоомсорлосноор хүндⁱ нүгэлд унаж, хэсэг хугацаанд тэндээ байж болно. Үүгээр тэд Бурханы^k дургүйцлийг авч, Ариун Сүнсийг гомдоож, өөрсдийн нигүүлслүүд ба^l тайтгарлуудыг доройтуулж, зүрхээ хатууруулж, мөс чанараа шархлуулж,^m бусдад гэм хор, бүдрүүлэл болж, өөрсөд дээрээ цаг зуурын шүүлтүүдⁿ авчирч болно. Гэсэн ч тэд^o гэмшлээ шинэчилж, Христ Есүст итгэх итгэлээр эцэс хүртэл хадгалагдана.