Бүлэг 1Ариун Судрын тухай

Ариун Судар бол аврах мэдлэг, итгэл ба дуулгавартай байдлын цорын ганц хангалттай, баттай, алдаа мадаггүй^a дүрэм мөн. Байгалийн^b гэрэл, бүтээл ба захирлын үйлс нь Бурханы сайн сайхан, мэргэн ухаан, хүчийг хүмүүсийг шалтаггүй болгох хэмжээнд илэрхийлдэг боловч авралд зайлшгүй хэрэгтэй Бурхан ба Түүний хүслийн мэдлэгийг өгөхөд хангалттай биш.^c Тиймээс Эзэн олон хэсгээр болон янз бүрийн арга замаар Өөрийгөө илчилж, Өөрийн хүслийг чуулгандаа мэдүүлэхээр таалсан. Дараа нь үнэнийг илүү сайн хадгалж, түгээх, махан биеийн завхрал, Сатан ба ертөнцийн хорслын эсрэг чуулганыг илүү бат тогтоон, тайтгаруулахын тулд тэр илчлэлтээ бүхэлд нь^d бичвэрт даатгасан. Иймээс Ариун Судар нэн зайлшгүй болсон бөгөөд Бурхан Өөрийн хүслийг ард түмэндээ илчилдэг байсан өмнөх арга замууд одоо зогссон юм.

“Ариун Судар” буюу бичигдсэн “Бурханы Үг” гэдэг нэрийн дор одоо Хуучин ба Шинэ Гэрээний дараах бүх номууд багтана.

Хуучин Гэрээний номууд:

Эхлэл, Египетээс гарсан нь, Левит, Тооллого, Дэд хууль, Иошуа, Шүүгчид, Рут, 1 Самуел, 2 Самуел, Хаадын дээд, Хаадын дэд, Шастирын дээд, Шастирын дэд, Езра, Нехемиа, Естер, Иов, Дуулал, Сургаалт үгс, Номлогчийн үгс, Соломоны дуун, Исаиа, Иеремиа, Гашуудал, Езекиел, Даниел, Хосеа, Иоел, Амос, Обадиа, Иона, Мика, Нахум, Хабаккук, Зефаниа, Хаггаи, Зехариа, Малахи.

Шинэ Гэрээний номууд:

Матай, Марк, Лук, Иохан, Элч нарын үйлс, Паулын Ромчуудад бичсэн захидал, 1 Коринт, 2 Коринт, Галат, Ефес, Филиппой, Колоссай, 1 Тесалоник, 2 Тесалоник, 1 Тимот, 2 Тимот, Тит, Филемон, Еврейчүүдэд бичсэн захидал, Иаковын захидал, Петрийн эхний ба хоёр дахь захидал, Иоханы эхний, хоёр дахь ба гурав дахь захидал, Иудагийн захидал, Илчлэлт. Эдгээр бүгд^e Бурханы амьсгалаар өгөгдсөн бөгөөд итгэл ба амьдралын дүрэм байхаар өгөгдсөн.

Апокриф гэж нийтлэг нэрлэгддэг номууд нь^f тэнгэрлэг онгодоор бичигдээгүй тул Судрын канон буюу дүрмийн нэг хэсэг биш. Иймээс тэд Бурханы чуулганд эрх мэдэлгүй бөгөөд бусад хүний бичвэрээс өөрөөр батлагдах эсвэл ашиглагдах ёсгүй.

Ариун Судрын эрх мэдэл нь түүнийг итгэгдэх ёстой болгодог бөгөөд энэ нь ямар нэг хүний эсвэл чуулганы гэрчлэлд бус, харин бүхэлдээ^g Бурханд, үнэний Өөрт нь, түүний Зохиогчид тулгуурладаг. Тиймээс Судрыг Бурханы Үг учраас хүлээн авах ёстой.

Бурханы чуулганы гэрчлэл бидэнд Ариун Судрыг өндөр, хүндэтгэлтэй үнэлэх сэтгэл төрүүлж, ятгаж болно. Мөн түүний агуулгын тэнгэрлэг чанар, сургаалын хүч нөлөө, хэв маягийн сүр жавхлан, бүх хэсгийн нэгдэл, бүхэл бүтэн зорилго нь Бурханд бүх алдрыг өгөх явдал, хүний авралын цорын ганц замыг бүрэн илчилдэг байдал, мөн түүн доторх зүйрлэшгүй олон давуу чанар, бүрэн төгс байдал нь Судар өөрөө Бурханы Үг гэдгээ элбэг хангалттай гэрчилдэг үндэслэлүүд юм. Гэсэн хэдий ч түүний алдаа мадаггүй үнэн ба тэнгэрлэг эрх мэдэлд бидний^h бүрэн итгэл ба баталгаа нь Ариун Сүнсний дотоод үйлсээс, Тэрээр Үгээр дамжуулан болон Үгтэй хамт бидний зүрхэнд гэрчилдгээс ирдэг.

Бурханы Өөрийн алдар, хүний аврал, итгэл ба амьдралдⁱ хэрэгтэй бүх зүйлийн тухай Бурханы бүхэл зөвлөл Ариун Сударт нэг бол ил тод бичигдсэн, эсвэл зайлшгүйгээр агуулагдсан байдаг. Түүн дээр Сүнсний шинэ илчлэлтээр ч, хүний уламжлалаар ч ямар ч цаг үед юу ч нэмэгдэх ёсгүй.

Гэсэн ч Үгэнд илчлэгдсэн зүйлсийг авралын утгаар ойлгоход Бурханы Сүнсний^k дотоод гэгээрэл зайлшгүй хэрэгтэй гэдгийг бид хүлээн зөвшөөрнө. Мөн Бурханы мөргөл ба чуулганы удирдлагад хамаарах зарим нөхцөл байдал нь хүний үйлдэл, нийгэмд нийтлэг байдаг учраас байгалийн гэрэл болон Христэч ухаалгаар, үргэлж сахигдах ёстой Үгийн ерөнхий дүрмүүдийн дагуу^l зохицуулагдах ёстой.

Судар дахь бүх зүйл өөрөө адилхан^m ойлгомжтой, бүх хүнд адилхан тодорхой байдаггүй. Гэвч авралын тулд мэдэх, итгэх, сахих шаардлагатай зүйлс Судрын нэг эсвэл өөр хэсэгт тиймⁿ тодорхой тавигдаж, нээгдсэн байдаг тул эрдэмтэй хүмүүс төдийгүй эрдэмгүй хүмүүс ч ердийн арга хэрэгслийг зөв хэрэглэснээр тэдгээрийг хангалттай ойлгож чадна.

Хуучин Гэрээ^o еврей хэлээр, Бурханы эртний ард түмний төрөлх хэлээр, мөн Шинэ Гэрээ грек хэлээр, бичигдэх үедээ үндэстнүүдэд хамгийн түгээмэл мэдэгдэж байсан хэлээр, шууд Бурханы амьсгалаар өгөгдсөн бөгөөд Түүний онцгой анхаарал ба захирлаар бүх үеийн турш цэвэр хадгалагдсан тул^p жинхэнэ эх бичвэрүүд мөн. Иймээс шашны бүх маргаанд чуулган эцэстээ тэдгээрт хандах ёстой.^q Харин эдгээр эх хэлүүдийг Бурханы бүх ард түмэн мэддэггүй. Гэсэн ч тэд Сударт эрхтэй, түүнтэй холбоотой бөгөөд Бурханаас эмээн уншиж,^r судлах тушаал авсан тул Судар тэдгээр^s хүрч очсон үндэстэн бүрийн нийтлэг хэлээр орчуулагдах ёстой. Ингэснээр Бурханы Үг бүгдийн дотор^t бялхам оршиж, тэд Түүнд тааламжтайгаар мөргөж, Судрын тэвчээр ба урамшуулалтаар дамжуулан найдвартай байна.

Судрыг тайлбарлах алдаа мадаггүй дүрэм бол^u Судар өөрөө юм. Тиймээс ямар нэг Судрын жинхэнэ ба бүрэн утгын тухай асуулт гарвал, тэр утга олон биш нэг байдаг тул илүү тодорхой ярьдаг бусад хэсгүүдээр нь судлах ёстой.

Шашны бүх маргааныг шийдвэрлэх, зөвлөлүүдийн бүх тогтоол, эртний зохиогчдын үзэл бодол, хүмүүсийн сургаал, хувийн сүнснүүдийг шалгах дээд шүүгч, бидний шийдвэрт амрах ёстой тэр эрх мэдэл нь Сүнсээр өгөгдсөн Ариун Судраас өөр байж чадахгүй. Ийн өгөгдсөн^x Сударт бидний итгэл эцэстээ тулгуурлана.